សភាអឺរ៉ុបជំរុញកម្ពុជាផ្ដល់អភ័យឯកសិទ្ធិឲ្យលោក សម រង្ស៊ី និងទម្លាក់បទចោទនានា

សភាអឺរ៉ុប ចេញផ្សាយញត្តិអំពាវនាវឲ្យរដ្ឋសភាកម្ពុជា ផ្តល់អភ័យឯកសិទ្ធិសភាដល់ លោក សម រង្ស៊ី ប្រធានគណបក្សសង្គ្រោះជាតិ។ សភាអឺរ៉ុប ក៏ជំរុញឲ្យរដ្ឋាភិបាលកម្ពុជា បញ្ឈប់ការធ្វើទុក្ខបុកម្នេញលើសកម្មជន និងតំណាងរាស្ត្រគណបក្សប្រឆាំង និងទម្លាក់ចោលច្បាប់ស្ដីពីសមាគម និងអង្គការមិនមែនរដ្ឋាភិបាលផងដែរ។

សមាជិកសភាអឺរ៉ុប ជិត ៥០រូបមកពីនិន្នាការនយោបាយផ្សេងគ្នា លើកឡើងពីក្តីកង្វល់មួយចំនួនជុំវិញស្ថានការណ៍នយោបាយ និងសង្គមនៅប្រទេសកម្ពុជា ដែលកំពុងស្ថិតក្នុងភាពចម្រូងចម្រាស។ តាមរយៈក្តីកង្វល់នេះ សភាអឺរ៉ុប អំពាវនាវដល់មន្ត្រីជាន់ខ្ពស់របស់ខ្លួន គឺអនុប្រធាននៃតំណាងជាន់ខ្ពស់សហភាពអឺរ៉ុប ទទួលបន្ទុកគោលនយោបាយសន្តិសុខ និងកិច្ចការបរទេស ឲ្យលើកឡើងពីស្ថានភាពនយោបាយ ច្បាប់ និងសិទ្ធិមនុស្ស ជាមួយរដ្ឋាភិបាលកម្ពុជា ដោយមិនមានការបង្អែបង្អង់។

នៅក្នុងញត្តិចំនួន ៣ ដាច់ដោយឡែកពីគ្នា ចេញផ្សាយនៅថ្ងៃទី២៤ ខែវិច្ឆិកា ឆ្នាំ២០១៥ សភាអឺរ៉ុប សម្ដែងក្តីព្រួយបារម្ភចំពោះភាពតានតឹងដែលកំពុងកើតមានឡើងរវាងរដ្ឋាភិបាលកម្ពុជា និងគណបក្សប្រឆាំង។

សភាអឺរ៉ុប ថ្កោលទោសចំពោះការប្រើប្រាស់អំពើហិង្សាលើអ្នកតំណាងរាស្ត្របក្សប្រឆាំងពីររូប គឺលោក គង់ សភា និងលោក ញ៉យ ចំរើន ដែលបានប្រព្រឹត្តនៅមុខរដ្ឋសភា កាលពីចុងខែតុលា កន្លងទៅ។ សភាអឺរ៉ុប អំពាវនាវឲ្យបញ្ឈប់ការប្រើអំពើហិង្សា ការគំរាមកំហែង និងការរំលោភបំពានផ្សេងៗទៅលើសកម្មជន និងតំណាងរាស្ត្របក្សប្រឆាំង ព្រមទាំងជំរុញឲ្យអាជ្ញាធរកម្ពុជា ធ្វើការឲ្យបានសកម្ម ដើម្បីធានាសុវត្ថិភាពចំពោះសមាជិកសភា និងនាំខ្លួនជនពាក់ព័ន្ធក្នុងការវាយប្រហារដោយហិង្សាលើអ្នកតំណាងរាស្ត្រ មកផ្ដន្ទាទោសតាមច្បាប់។

ទាក់ទងនឹងករណី លោក សម រង្ស៊ី សភាអឺរ៉ុប អំពាវនាវដល់រដ្ឋសភាកម្ពុជា ឲ្យផ្តល់អភ័យឯកសិទ្ធិជូន លោក សម រង្ស៊ី វិញ។ ក្រៅពីនេះ សភាអឺរ៉ុប ក៏អំពាវនាវដល់រដ្ឋាភិបាលកម្ពុជា ទម្លាក់ចោលបទចោទទាំងឡាយប្រឆាំង លោក សម រង្ស៊ី ព្រមទាំងអនុញ្ញាតឲ្យរូបលោក និងតំណាងរាស្ត្របក្សប្រឆាំងផ្សេងទៀត ត្រឡប់មកកម្ពុជា វិញដោយមិនបារម្ភពីការចាប់ខ្លួន ឬការធ្វើទុក្ខបុកម្នេញផ្សេងៗ។

កាលពីថ្ងៃទី១៣ ខែវិច្ឆិកា ឆ្នាំ២០១៥ សាលាដំបូងរាជធានីភ្នំពេញ បានចេញដីកាបង្គាប់ឲ្យចាប់ខ្លួន លោក សម រង្ស៊ី ដោយចោទពីបទបរិហារកេរ្តិ៍ជាសាធារណៈ និងញុះញង់ឲ្យមានការរើសអើង ប្រព្រឹត្តនៅសារមន្ទីរជើងឯក កាលពីឆ្នាំ២០០៨។ កាលនោះ លោក សម រង្ស៊ី បានចោទ លោក ហោ ណាំហុង បច្ចុប្បន្នជាឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស ថាជាអតីតប្រធានគុកបឹងត្របែក នៃរបបកម្ពុជាប្រជាធិបតេយ្យ។

វិទ្យុអាស៊ីសេរី មិនអាចទាក់ទង លោក ឡេង ប៉េងឡុង អគ្គលេខាធិការ និងជាអ្នកនាំពាក្យរដ្ឋសភា បានទេ នៅថ្ងៃទី២៥ វិច្ឆិកា ដើម្បីឆ្លើយតបនឹងសំណើរបស់សភាអឺរ៉ុប នេះ។

ប៉ុន្តែ លោក សុខ ឥសាន ដែលជាអ្នកនាំពាក្យគណបក្សប្រជាជនកម្ពុជា វិញ ឆ្លើយតបថា សភាអឺរ៉ុប គួរតែគិតគូរពីបញ្ហាសន្តិសុខពិភពលោកវិញ មិនគួរណាយកករណី លោក សម រង្ស៊ី មកនិយាយនោះទេ៖ «សភាពការណ៍ឥឡូវ គឺ ISIS ទេ ដែលវារាតត្បាតទូទាំងពិភពលោក។ អ៊ីចឹងឲ្យយកចិត្តទុកដាក់។ អាហ្នឹងដែលវាជាគ្រោះមហន្តរាយសម្រាប់មនុស្សជាតិយើង។ ពាក់ព័ន្ធនឹងឯកឧត្តម សម រង្ស៊ី គួរតែហៅឯកឧត្តម សម រង្ស៊ី ទៅណែនាំ កុំឲ្យធ្វើផ្ដេសផ្ដាសទៅធ្វើរំលោភច្បាប់ ដល់ពេលគេអនុវត្តច្បាប់ រត់មកឱបជើងឱបដៃស្អីទៀត»។

ជុំវិញរឿងសិទ្ធិមនុស្សវិញ សភាអឺរ៉ុប អំពាវនាវឲ្យអាជ្ញាធរកម្ពុជា បញ្ឈប់ការប្រើប្រាស់អំណាចនយោបាយទៅលើប្រព័ន្ធតុលាការ និងដោះលែងសកម្មជនបក្សប្រឆាំងដែលកំពុងជាប់ពន្ធនាគារ ជាពិសេស គឺបញ្ចប់ការធ្វើទុក្ខបុកម្នេញចំពោះសកម្មជនការពារសិទ្ធិមនុស្ស។ លើសពីនេះ សមាជិកសភាអឺរ៉ុប ចង់ឃើញអាជ្ញាធរកម្ពុជា គោរពអ្វីដែលមានចែងក្នុងរដ្ឋធម្មនុញ្ញកម្ពុជា ឲ្យបានពេញលេញ ទាក់ទងទៅនឹងលទ្ធិប្រជាធិបតេយ្យសេរីពហុបក្ស សេរីភាពបញ្ចេញមតិ និងសេរីភាពនៃការជួបប្រជុំ ពិសេសធ្វើការផ្សព្វផ្សាយអំពីសិទ្ធិ និងសេចក្តីថ្លៃថ្នូររបស់ប្រជាជនកម្ពុជា តាមរយៈការគាំពារសិទ្ធិនយោបាយ និងសិទ្ធិពលរដ្ឋ។

អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បញ្ជាក់ត្រង់ចំណុចនេះថា តុលាការកម្ពុជា តែងអនុវត្តការងារតាមឯករាជភាពរបស់ខ្លួន ដោយមិនរងសម្ពាធនយោបាយណាមួយឡើយ៖ «អង្គហេតុ និងអង្គច្បាប់ ជាសេចក្តីវិនិច្ឆ័យរបស់តុលាការកម្ពុជា មិនមែនតុលាការអឺរ៉ុប នោះទេ។ យើងដឹងហើយថា តុលាការជាស្ថាប័នឯករាជ្យដែលគ្មាននរណាប៉ះពាល់ ដោយសារការវិនិច្ឆ័យរបស់តុលាការជាផលប្រយោជន៍របស់ប្រជាពលរដ្ឋកម្ពុជា»។

ក្រៅពីបញ្ហានយោបាយ និងសិទ្ធិមនុស្ស សភាអឺរ៉ុប ក៏បានសង្កត់ធ្ងន់ទៅលើការបង្កើតច្បាប់មួយចំនួនដែរ ដែលមានលក្ខណៈរឹតត្បិតដល់សេរីភាពបញ្ចេញមតិ និងការប្រមូលផ្តុំ។ នោះ គឺជាច្បាប់ស្ដីពីសមាគម និងអង្គការមិនមែនរដ្ឋាភិបាល ដែលត្រូវបានរដ្ឋសភាអនុម័តកាលពីខែកក្កដា កន្លងទៅ និងសេចក្តីព្រាងច្បាប់ស្ដីពីសហជីព ដែលកំពុងត្រូវបានពិភាក្សា។ សភាអឺរ៉ុប ពិនិត្យឃើញថា ច្បាប់ទាំងពីរនេះត្រូវបានតាក់តែងឡើងដោយមិនស្របតាមបទដ្ឋាន និងនិយាមអន្តរជាតិ ហើយនិងមានចំណុចរសើបជាច្រើន ដែលគ្រប់ភាគីពាក់ព័ន្ធគួរតែជជែកគ្នាឲ្យបានស៊ីជម្រៅ។ សភាអឺរ៉ុប ទាមទារឲ្យរដ្ឋាភិបាលកម្ពុជា លុបចោលច្បាប់ និងពង្រាងច្បាប់នេះចេញ។

បន្ថែមពីលើនេះ សភាអឺរ៉ុប ជំរុញឲ្យរដ្ឋាភិបាលកម្ពុជា បំពេញកាតព្វកិច្ចរបស់ខ្លួនក្រោមសន្ធិសញ្ញា និងកតិកាសញ្ញាផ្សេងៗ ដែលខ្លួនជាភាគីស្រាប់ ហើយនិងត្រូវពង្រឹងកិច្ចសហប្រតិបត្តិការជាមួយទីភ្នាក់ងាររបស់អង្គការសហប្រជាជាតិ ដូចជាការិយាល័យឧត្តមស្នងការអង្គការសហប្រជាជាតិ ជាដើម តាមរយៈការពង្រឹងកិច្ចសន្ទនា និងការធ្វើការរួមគ្នា៕

http://www.rfa.org/khmer/news/politics/EU-on-Rainsy-political-case-11252015000707.html